തെരുവുസര്‍ക്കസ്

വിശപ്പിനെ പറ്റിക്കാന്‍ 

ഒഴിഞ്ഞ കലത്തില്‍

അമ്മ കയിലിട്ടിളക്കുന്നത് കണ്ടാണ്‌ 

ചെണ്ട കൊട്ട് പഠിച്ചത് 

ഒക്കത്തും തോളിലും 

തൊട്ടിലിലുമായി

നാലെണ്ണത്തെയേല്‍പ്പിച്ചാണ്

അമ്മ പോയത് 

കുടിച്ചു വരുന്ന അച്ഛനില്‍ നിന്നാണ് 

ബാലന്‍സ് ചെയ്യാന്‍ പഠിച്ചത് 

തലയിലൊരു കുടവുമായി 

മുളംബാലം എത്ര കടന്നതാണ് 

ഒട്ടിയ വയറുമായി 

വളയം ചാടാനെളുപ്പമാണ്

ജീവിതം തന്നെ 

ഒരു ഞാണിന്മേല്‍ക്കളിയായിരുന്നല്ലോ 

ചിലതൊക്കെ കാണുമ്പോള്‍ 

തലകുത്തി മറിയാന്‍ തോന്നും

തല തിരിഞ്ഞ ലോകത്ത് 

തല കീഴായി നടക്കാനും 

കുടിലിലെ പട്ടിണിയും പരിവട്ടവും 

ആരോ ജപ്തി ചെയ്തപ്പോള്‍ 

തെരുവിലെക്കിറങ്ങിയതാണ് 

നിങ്ങളതിന് സര്‍ക്കസെന്നു പേരിട്ടു 

ഞാന്‍ ജീവിതമെന്നും..!