Total Pageviews

Tuesday, April 24, 2018

മതിലു ചാടി വരുന്ന ഓർമകൾ


രണ്ടാളുയരത്തിൽ മതിലു കെട്ടിയതിൽപ്പിന്നെ
ഇപ്പോൾ വീട്ടിലേക്കാരും വരാറില്ല.
എന്നാലും ക്യാമറക്കണ്ണുകൾ വെട്ടിച്ച്
മതിലുചാടി വരും, ഇടയ്ക്കിടയ്ക്ക് ഓർമകൾ.

പച്ച ഷാൾ പുതച്ച്, അറബന മുട്ടി
താടി ചുവപ്പിച്ച അജ്‌മീർ ഫഖീർ
സോപ്പ്, ചീപ്പ്, കണ്ണാടിയെന്നു പറഞ്ഞ്
കുപ്പിവളകിലുക്കുന്ന കഷണ്ടിക്കാരൻ
ഏതെടുത്താലും ആറുരൂപയെന്ന്
നീട്ടിവിളിക്കുന്ന സ്റ്റീൽ പാത്രക്കാരൻ
മുളങ്കുട്ടയിലെ മണ്പാത്രങ്ങൾക്കൊപ്പം
വെയിലുകൊണ്ട് ചുവന്ന കുശവൻ
ഭാവി പറയുന്ന കുറത്തി, തോളിലെ കൂട്ടിൽ
വർത്തമാനം പറയുന്ന തത്ത
ആടെട, ചാടെട, കുത്തിമറിയെടാ
ചാടിക്കളിക്കുന്ന കുഞ്ചിരാമൻ
കിനാക്കളൊക്കെയും വെള്ളപ്പൊക്കത്തിൽപ്പോയ
ബംഗാളിപെണ്ണുങ്ങൾ, കുട്ടികൾ
അമ്മി കൊത്താനുണ്ടോ, ഉരലു കൊത്താനുണ്ടോ
പൊക്കണം തൂക്കിയ അണ്ണാച്ചിപെണ്ണുങ്ങൾ...

നാളെയാവട്ടെ, ഓർമകളെയൊക്കെ
പിടിച്ചു പുറത്താക്കി വാതിലടക്കണം,
ഗെയ്റ്റിലൊരു ബോർഡു തൂക്കണം
"അനുവാദം കൂടാതെ അകത്തു കടക്കരുത്"

***റഹീം പൊന്നാട്***

Monday, April 24, 2017

ജനറേഷന്‍


നാരങ്ങാ മുട്ടായി
പഞ്ചാര മുട്ടായി
പുളിയച്ചാര്‍
പാലൈസ്...
കളിപ്പീടികയില്‍
കറങ്ങിനടക്കുന്നു,
ഓര്‍മകള്‍..!
ഫെയ്സ്ബുക്ക്
വാട്സാപ്പ്
കാര്‍ട്ടൂണ്‍
ഗെയിംസ്...
പ്ലേ സ്റ്റോറില്‍
കറങ്ങിനടക്കുന്നു,
മകള്‍..!!

Tuesday, August 23, 2016

മരണ ശേഷം

മരണ ശേഷം,
നീയെന്‍റെ ഖബറിനു മുകളില്‍
ഒരു മൈലാഞ്ചിച്ചെടി നടണം.
വളര്‍ന്നു വരുമ്പോള്‍
നീയതില്‍ നിന്നൊരു ചില്ലയിറുക്കണം.
എന്‍റെ രക്തം പൊടിയും വരെ
ഇലകള്‍ അരയ്ക്കണം.
അതുകൊണ്ട് നിന്‍ കൈയിലൊരു
ഹൃദയ ചിത്രം വരയ്ക്കണം.
അങ്ങനെയെങ്കിലും പ്രണയമേ
നിന്‍ കരതലമൊന്നെനിയ്ക്കു പുണരണം

Thursday, April 21, 2016

തലമുറകൾ


കുടുംബ സംഗമത്തിനെത്തിയവർ 
ഭക്ഷണ ശേഷം 
ഗ്രൂപ്പായിപ്പിരിഞ്ഞു.

വട്ടക്കണ്ണട
ഊന്നുവടി
കാലൻ  കുട
വെറ്റിലച്ചെല്ലം 
ചുണ്ണാമ്പു കുപ്പി 
തസ്ബീഹ് മാല 
മുതലായവർ 
നടുമുറ്റത്ത് വട്ടം കൂടിയിരുന്ന് 
കഥകൾ പറഞ്ഞു.

ഷുഗർ 
പ്രഷർ 
അൾസർ 
കൊളസ്ട്രോൾ 
കിഡ്നി സ്റ്റോൺ 
ഹാർട്ട് അറ്റാക്ക് 
മുതലായവർ 
മരച്ചുവട്ടിൽ ബഞ്ചിലിരുന്ന് 
ഓർമകൾ ചികഞ്ഞു.

ഗൂഗ്ൾ 
യൂ ട്യൂബ് 
വാട്സാപ്പ് 
ഇൻസ്റ്റാഗ്രാം
ലിങ്ക്ഡ് ഇൻ  
ഫെയ്സ്ബുക്ക് 
മുതലായവർ 
മതിലിൽ പുറംതിരിഞ്ഞിരുന്ന് 
വൈ ഫൈ തെരഞ്ഞു.


Wednesday, February 24, 2016

നീ

ഉള്ളിലുരയുന്നു നീ
ഉള്ളിലുയരുന്നു നീ
ഉള്ളിലുറയുന്നു നീ 
ഉള്ളിലുയിരുന്നു നീ.

Tuesday, January 26, 2016

മരിച്ചവരുടെ ഫെയ്സ്ബുക്ക് പ്രൊഫൈൽ


ഓർമകളിലേക്ക് ലോഗിൻ ചെയ്‌താൽ, 
മരിച്ചവരുടെ ഫെയ്സ്ബുക്ക് പ്രൊഫൈൽ 
നിരന്തരം അപ്ഡേറ്റാകുന്നത് കാണാം.
കുട്ടിക്കാലത്ത്  ആദ്യംകണ്ട നാൾ മുതൽ 
ഓർമകൾ റീപ്ലേ ചെയ്തു കൊണ്ടേയിരിക്കും.
ദ്രവിച്ചു തുളവീണ പ്രൊഫൈൽ  ചിത്രങ്ങൾ 
ഒന്നൊന്നായി മാറിക്കൊണ്ടേയിരിക്കും.
തമാശകൾ, കളിചിരികൾ, കുസൃതികൾ,
കഥകൾ, കവിതകൾ, പാട്ടുകൾ...
സ്റ്റാറ്റസുകൾ പുതുക്കിക്കൊണ്ടേയിരിക്കും.
ദുഃഖം, സന്തോഷം, കോപം, ഭയം,
ബാക്ക്ഗ്രൗണ്ടിലെ നിറങ്ങൾ മാറിമറിയും.
പിണക്കം, ഇണക്കം, പരിഭവം,
അസൂയ, കുശുമ്പ്, പരിഹാസം...
സ്മൈലികൾ  തുരുതുരാന്ന് വരും.
മായ്ച്ചിട്ടും മായാത്ത ചില സ്റ്റിക്കറുകൾ 
ഹൃദയത്തിൽ ഒട്ടിപ്പിടിച്ചിരിക്കും.

എല്ലാം സഹിക്കാം,
ചിലനേരങ്ങളിൽ മെസേജിൽ വന്നിട്ടു ചോദിക്കും,
'ടാ...സൈൻ ഔട്ട്‌ ചെയ്തിട്ട് ഇങ്ങുപോരാറായില്ലേ'ന്ന്‌!!
അപ്പോൾ മാത്രം സ്ക്രീനിൽ ഇരുട്ട് നിറയും.