പൗരത്വം

പൗരത്വത്തിനു വേണ്ടിയുള്ള വരിയിൽ

അദ്ദേഹം താണു വണങ്ങി നിന്നു.

പേര്?

'അഹിംസ'

രാജ്യം?

'സ്വരാജ്'

മതം?

'സ്നേഹം'

ജാതി?

'മനുഷ്യൻ'

പ്രായം?

'രാജ്യത്തിന്റെ അതേ പ്രായം'

എന്താണ് രേഖകളുള്ളത്?

വടി

കണ്ണട

ഖദർ

ചർക്ക...

ഒന്നൊന്നായി അവർ പരിശോധിച്ചു

ഇതൊന്നും പറ്റില്ല.

വേറെന്തെങ്കിലും..?

നെഞ്ചിലെ മൂന്ന് തുളകൾ കാണിച്ചു.

"ദേശദ്രോഹി"!

"കടന്നു പോകൂ"

കൗണ്ടറിലിരുന്നയാൾ അലറി.

അടുത്തയാൾ വന്നു

മൂന്നു വെടിയുണ്ടകൾ മേശപ്പുറത്ത് വച്ചു.

ചോദ്യങ്ങളൊന്നുമുണ്ടായില്ല.

"കയറിയിരിക്കൂ"

കൗണ്ടറിലിരുന്നയാൾ കൈ കൂപ്പി.